जनकल्याण सहकारीकाे वार्षिक साधारण सभा सम्पन्न

टीकापुर, ८ असोज
कैलालीको टीकापुर स्थित जनकल्याण बचत तथा ऋण सहकारी संस्था लिमिटेडको १० औैं वार्षिक साधारण सभा शुक्रबार सम्पन्न भएको छ ।
संस्थाका अध्यक्ष बद्रि प्रसाद भट्राईको सभापतित्वमा भएको कार्यक्रममा नेपाल बचत तथा ऋण केन्द्रिय सहकारी संघ लि. (नेफ्स्कुन) का अध्यक्ष परितोष पौडेल प्रमुख अतिथि रहनुभएको थियो । कार्यक्रममा सुदूरपश्चिम प्रदेश बचत तथा ऋण सहकारी संघका अध्यक्ष माधव प्रसाद जोशी तथा नेफ्स्कुनका सञ्चालक यज्ञ प्रसाद ढकाल विशिष्ट अतिथि रहनुभएको थियो । कार्यक्रममा सम्बोधन गर्दै प्रमुख अतिथि पौडेलले सहकारी संस्थाहरुलाई अब नीति, विधि र प्रविधिमा संचालन गर्नुपर्नेमा जोड दिनुभयो । हाम्रा संस्थाका सेवाहरु अब डिजिटलाइज हुनपर्नेमा ध्यान दिन जरुरी रहेको उहाँको भनाइ थियो ।
सहकारीका उपाध्यक्ष नृपराज भण्डारीले स्वागत मन्तव्य राख्नुभएको कार्यक्रमको संचालन व्यवस्थापक छबिलाल जैशीले गर्नुभएको थियो । कार्यक्रममा राष्टिय सहकारी बैंकका संचालक शिवा थापा, टीकापुर नगरपालिका सहकारी शाखा प्रमुख नन्द बहादुर केसी, संस्थाका संस्थापक अध्यक्ष गणेश बहादुर साउँद लगायतले शुभकामना मन्तव्य राख्नुभएको थियो । कार्यक्रममा ५ जना शेयर सदस्य, ५ जना बचतकर्ता र ३ जना ऋण कारोबार गर्ने सदस्यहरुलाई सम्मान गरिएकोे छ । सम्मानित हुने शेयर सदस्यहरुमा कल्पना देवि जैशी, टिकाराम जैशी, विनोद वरही, गणेश बहादुर साउँद र धन्यादेवि खड्का रहेका छन् । त्यसैगरी, उत्कृष्ट बचतकर्तामा सम्मानित हुनेहरुमा शंकर देवकोटा, कमला चौधरी, निर्मला न्यौपाने (धमाला), वाशुदेव पौडेल र प्रमोद चौधरी रहेका छन् । त्यसैगरी, उत्कृष्ट ऋण कारोबार गर्नेहरुमा जीवन न्यौपाने, पारवती देवि चौधरी र आरती चौधरी सम्मानित भएका छन् ।
साधारणसभाले संस्थाका अध्यक्ष बद्रि प्रसाद भट्टराईले प्रस्तुत गर्नुभएको संचालक समितीको प्रतिवेदन पारीत गरेको छ । त्यसैगरी लेखा समिती संयोजक उमाकान्त भण्डारी, सचिव मनोज कुमार साउद र कोषाध्यक्ष लालकेश जैशीले प्रस्तुत गर्नुभएको प्रतिवेदनहरु समेत सर्वसम्मत पारीत भएको छ । प्रतिवेदन अनुसार सहकारीले २०७८ भदौ मसान्त सम्ममा ९ सय जना शेयर सदस्यबाट १ करोड १४ लाख २२ हजार ३ सय रुपैयाँ शेयर संकलन गरेको छ । त्यसैगरी सोही अवधिमा २ करोड ९१ लख ९१ हजार ४ सय ६० रुपैयाँ निक्षेप संकलन गरेको छ । सदस्यहरुमा ऋण लगानी ४ करोड ५५ लाख ४६ हजार रहेको उल्लेख गरिएको छ । सहकारीकोे आर्थिक वर्ष २०७७÷०७८ मा ५६ लाख ५७ हजार ७ सय ३७ रुपैयाँ ३७ पैसा बराबर आय÷व्यय विवरण प्रस्तुत गरिएको छ । त्यसैगरी ५ करोड ७६ लाख ३१ हजार २९ रुपैयाँ ६० पैसा बराबरको सम्पत्ति तथा दायित्व विवरण प्रस्तुत गरिएको थियो । जनकल्याण सहकारी आर्थिक वर्ष २०७६÷०७७ मा राष्टिय सहकारी बैंक तथा २०७७÷०७८ मा नेफ्स्कुनबाट सुदूरपश्चिम प्रदेशमा संचालित बचत ऋण कारोबार गर्ने सहकारी संस्थाहरुमा उत्कृष्ट संस्थाको रुपमा सम्मानित हुन सफल भएको छ ।